تبغاها من جد.. تصير جدة "غير"!! (12)

يا أخي لو تبغاها من جد تصير جدة، لازم نبدأ بأنفسنا، ونعيد النظر في طريقة حياتنا ومعاملتنا لجدة وأهل جدة.. كلهم... وضيوف جدة.. وضيوف مكة ألي إحنا بوابتها.. لازم نراجع مشاعرنا ناحية بعضنا.
إيش بنا صرنا قاسيين على بعض كذا؟ وأكبر قسوتنا على جدة.. كأنها ما هي حقتنا.. تكسير أرصفة وقلع أشجار وكتابة على الجدران ومخلفات تترمى من اليمين واليسار وأذية للبشر في الشوارع وبواري على الفاضية والمليانة وطناش لحقوقي وحقوقك، ولا إحنا عارفين نفرق بين الشحاتين وعمال النظافة الي صاروا أكثر مننا وبلا فائدة.
بلاش نفتري في بعض لما تكون لنا مصالح عند بعض، لا تعاملني بقرف لو جيت مكتبك توقعلي معاملة وما ترتاح إلا لو شوفتني 10 15 مرة رايح جاي عليك أترجاك أنك تتذكر كل طلباتك مرة واحدة بدل ما أتبهذل في الدخلة والطلعة وأزحم شوارع البلد بسيارتي.. فكر إن "كما تدين تدان" و"الكرسي دوارة"، فكر إن كل واحد فينا راح يكون صاحب حاجة في يوم من الأيام ولابد تذوق من نفس الكاسة.