بالبلدي الفصيح .. تبغاها من جد.. تصير جدة (غير)!! (4)

أدري أنو لو ربنا رزقك بقطعة أرض، ما تفكر في توصيلات موية ولا مجاري، لأنك فاقد أمل أساساً، وتبدأ تتقاول على الخزانات، والسبب ان المسافة بين ارضك وبين اقرب محطة تحلية او محطة معالجة مجاري - وانت بكرامة - يمكن اطول من 70 او 80 كيلو مواسير ومناهل ومحطات ضخ ومحولات وعالم تاني ما احنا حاسبين حسابه.. ولساعنا نروح نشتري اراضي فوق في الشمال.. معذورين، وانا أولكم، هادا قدر اللحاف وهادي مدة رجولنا.. يا خوفي يجي يوم تلاقي بحيرات الأفندي صارت وسط البلد!! وحتلاقينا برضو قاعدين نشتكي زحمة الشوارع وطول المشاوير، كأننا اتفاجأنا!!! مو إحنا إل سوينا هادا كله بيدنا!!!
وهادي إيش الأبراج إل طالعة على الطورنيش دي يا خويا؟؟ من 30 دور وإنت طالع، وفوق ال 100 دور البشر تدور تصاريح البنا.. طبعا ما كنا نعرفها، ويبغى لنا ابو 20 سنة علشان نتعلم نعيش فيها وحواليها. أكيد فرحانين بيها، بس بالهداوة نأخذ وقتنا في التفكير شوية.. هم اللي بنوها قبلنا دول ما هم أوادم كتبوا كتب تقول ايش مشاكل البنا العالي؟ خلي بالك دول هم الحريصون وعندهم انظمة بنا واكواد مباني ما تخر الموية مو زي حكايتنا!! هيا لا سمح الله لو قامت حريقة في ال15 عندنا، اكيد نورط، فما بال بابو ال50 وال60؟؟ ما قولتلك.. اكيد يبغالها تفكير!!