قصيدة للشاعرة أمل الشمري

الحاجة اللي مانبي نبلى بها نبلى بها
واللي نخليها عربنا ماهم مخلينها!
••••
ترا السوالف كل ابوها ماطرقنا بابها
يوم ان خلق الله تحرا فك ّمصراعينها
••••
كل حشمتي لوجيه اعشقها واحب ترابها
واذا علي ودي بجز رقابها في حينها
••••
يالابسين الود وانتم قالبين ثيابها
ترا غداً يغرق خشبها ويعتلي فلينها
••••
ياكثرهم لاقال قالوها وهو عرابها
من خلفنا يحيي فتن قد اُطفأت في حينها
••••
اطى على روس العرب مدري على اعصابها
مدري على يدينها مدري على رجلينها !
••••
ممكن عداواتك تجي ممن تنال اعجابها
كسر البيوت يبان لحظۃ شلها وتلحينها
••••
آحب في الاعراب اصعبها وافك إعرابها
مختمتها يوم غيري غرغر بتنوينها
••••
اثمِّن الكلمه قبل تطلع حسبت حسابها
الا على اللي لانوا يلوي الحكي لاوينها
••••
والكلمه العسره اوضحها وابرّي نابها
احِدها لاهل النميمه قبلۃ مولينها
••••
من بين دقات البناجر واللحى واشنابها
دوشكات راعين المعارك إِمّها وستينها
••••
تلقى وسم ردي على جبهاتهم تزهى بها
ياقوها في حقهم .. في ذمتي يازينها
••••
مليت من كثر ادعاء اشياء ما ارضى بها
واسأل خيالاتي وضميري ياترى ترضينها
••••
من كثر كرهي للكلام آحسني اولى بها
والى متى ارد عمن حاشني سكينها ..!