فضها سيرة

مدري وش أقول لكن جعلها خيرة
لو إن بعض السوالف.. مالها داعي
ان جت لطاري المعاتب فضّها سيرة
من كف غيرك ترى ما برّيت أوجاعي
لا تكمّل اللي بقى.. وتزوّد الحيرة
بعد غيوم الصبر شحّت على قاعي
همّك لحاله بنى له في الحشاء ديرة
وانا يا الله افلّ لهمّي شراعي
ضايق.. وثوبي عليّ أفك أزاريره
وكل الحسايف.. معي جملة وقطّاعي
خطاً.. ما يستاهل اندوّر معاذيره
لا أقنعك فيه وبلاش تحاول اقناعي
إن كانك لغيبتك قصيت تأشيرة
الالتفاته وراء ما هي من أطباعي
لك مني آحفظ لذاك الوقت تقديره
وأسامحك من دهر عمري لمرباعي
لو تعرف الود والتقدير والغيرة
ما رحت ترقد وغيرك ساهرٍ واعي