من خبرة الخوة وتدريس الايام = ومن كثر ما خويت بخلاء واجاويد ومن واقع الخبره على طول الاعوام =تجارب الدنيا صدور ومواريد واهم ما حصلت في سرد الارقام =إن الوفاء عينته اصلي وتقليد وعينت في العربان وافين واقزام =وحصلت فيهم مثل عنتر وابو زيد وعينت شيخ شيخته تاج ووسام =ناموس ربعه في المهمات صنديد اذا بدا الواجب وجاء لازمه قام =شيخٍ على اسمه شيخ تيدٍ على تيد وعينت شيخ شيخته بس هندام =لا يقضي اللازم ولا فاد له فيد اهم شي البشت وشماغ بسام =والقصر والفكسار ومقانص الصيد والشيخة اللي صارت فلوس واختام =ما تظهر الا في المنصٌات والعيد قولوا لاهلها تجعل الشبح قدام =حمل الامانه تتعب العبد والسيد وعينت به شايب صميدع ومقدام =وعينت به شايب مهرقل وعربيد وعينت به شيخ يحدّث ونمام =ثوبه قصير وجبهته كنّها حيد وعينت به شيخان لدين خدام =نور المساجد بين فقه وتوحيد وعينت من فكره مغسّل وهدام =يهدم وفكره بين شبهه وتنكيد وعينت منهو يشبهه الصقر لاحام =دون الوطن ياقف بشهب البِواريد وعينت عدوان العقيدة والإسلام =بالعلمنه والغدر والكذب والكيد يهمهم نصبح دويلات وأقسام =اقلامهم ضد العقيده عباريد وعينت ناس للوطن درع وحزام = يهمهم نصبح عصب كف ونشيد ويصير مافينا جهاهيل واخصام =اخوان في المله ولا فيه تعقيد وعينت لي تاجر يدّور للأيتام =لا عيّن المحتاج يعطيه ويزيد في السر مايعلن بها بين الآنام =يبذل ولا يدري بها زيد وعبيد وعينت لي تاجر من العام للعام =يسعى ورا السمعة وبعض المقاصيد اهم شي إن الدعاية والافلام =يبثها الارسال مرات ويعيد يحركه صوت الاهازيج وأنغام =تومي به الشيلات مدري الأناشيد وعينت في الشعار جزلين وآعلام =فطاحلة في الشعر والفعل والجيد قصيدهم فيه النزاهه والاحكام =ويمّجدونه قدوة الدين تمجيد وعينت لي شاعر يدّور للإعلام =اغلب قصيده في المجالس مناقيد يصيح باعلى الصوت يعني انا هآم = يبغى يسوي له دعاية وتجديد واكبر طموحه حاجتين بالاحلام = شهره ويملا الكف من مدة الايييد ياليت وان العود في لليلته نام =ولا تعّرض صيد حزم الجلاميد مايدري ان حتى النساء طيرهن حام =يعلّمه ( قوقل ) عن العلم الاكيد واقرب مثل عيدة بحر شعر وإلهام =والابداع فازت به نجاح المساعيد وديّنت لي ديّان صادق وهمهام =وافي ويصدق في جميع المواعيد وديّنت لِي ديّان طاغي وظلاّم =وفاه مثل الذم في باشة الغيد هذا بعض ماشفت في الشرق والشام =دونتها بالسجل والرقم والقيد واللي مهيضني اصوغه بالاقلام = ان الوفاء عينته اصلي وتقليد مضواح بن شتوي
