قصيدة حصرية للشاعر محمد بن سحمي

كلٍ توجه صوب باريس وجنيف=وانا هوى نجد العذيه جذبني
احبها والحب شرع المواليف= حبٍ اليامني محيته كتبني
ارضٍ شتاها قاسي ويصفها صيف=هرم غلاها بين الاضلاع مبني
هي ديرة اهل الطيب والسيف والكيف= حبي لها برضاي ماحدٍ غصبني
يحشم بها العاني ويكرم بها الضيف=ريحة ثراها عندي اغلا من ابني
سمومها لو تحرق الوجه تشريف= كم حاقد من دونها مات غبني
اكتب بها ووظف الشعر توظيف= شاعر ومبدع والله اللي وهبني
ماتحت برج إيفل دلال وسواليف= واللي يقدر جوها ماغلبني
محمد بن سحمي