"البر" الشاعر بداح مذكر الكوادر

ضوها مشبوبة" والجو هادي
في مسيل" سايل" والسيل عاده
جرته باقي مواريها جدادي
واخوياي اثنين والجيب بعتاده
جكس فل ابشن هدد والقير عادي
هذي عند بداح مفهوم السعاده
لو يقولون أكثر العربان غادي
سجة" في البر هي شربه وزاده
وفي التمدن لا حياة لمن تنادي
الكبتشينو لو السكر زياده
جعله إفدا الدله وريح القنادي
وابدوي" جر مسحوبه وعاده
عندي أحسن من طلال ومن عبادي
وصفحة الماسنجر وسوسن وغاده
فدوة" للي تجلبب بالسوادي
انا متعلم شهاداتي شهاده
وأحمد الله جت بجدي واجتهادي
عاد عصر العولميه في مهاده
فاهم ومتحضر وعندي مبادي
وخذت من بعض التجاريب استفاده
لين ميزت الصباح من الهجادي
والحياه دروس مافيها شهاده
ماتميز جامعي" من عدادي
كل من يزرع بها يجني حصاده
كان ما جاته معاصير الجرادي
وان نشدت بداح وش معنى السعاده
هذا معناها لو تقولون غادي
طعني وسج القدم خل الزهاده
ما يصاغي للظلال إلا الربادي
(بداح الكودري)