ويلي ما ينفع بالصيف

حسب خبرتي بعالم الحواري وكثرة لعب القواطي بالحوش والتمحط بالشموس اتوقع انه من الان فصاعدا ما عاد يستفيد نادي الهلال من لاعبه السويدي ويلهامسون وراح يتغنى الهلاليين طوال الصيف ويلي ويلاه، قبل كم يوم طلع محترف نادي الاتفاق الامريكي يصيح وينيح من حرارة الجو،والله العالم انه يخم شنطته ويهج زي اخوياه اللي قبله انحاشوا من المطار، الجو عندنا اللهم لا اعتراض راح يدخل بعد كم طباخ المخ، الصيف اللهاب، ولاشفت السي ديات بسيارتك كن ضاربهم نووي ،وصحت كل مالمست دركسون السيارة اعرف ان صيفنا شرف واستعد لزحمة الشوارع اللي ربع ساعة حزة الظهر فيها عن عشر ساعات عدا ونقدا،نرجع الى لاعب الهلال ويليهامسون السويدي، جاي من ارض خضار وبرد يحمر الخشم ومتعود يلعب في الصقيع (ياعيني على الفصحى)،فالمتوقع من خلال معلومات الارصاد الجوية اللي معلوماتها كنها الغاز تحتاج احد خبير بالالغاز عشان يفسرها لك،المتوقع ان درجات حرارة صيفنا الجاي راح تخلي خلايا مخ ويلي تغلي ولاعاد يفرق مستواه عن الغنام والا عن ابو نامي،مافيه اثنين يختلفون ان ويلي نص فريق وياكم مباراه حاس الفريق اللي قدامه والمدافعين حقينا مالهم حل معاه غير انهم يحاولون يلقطون رجله كود الله يفكه منهم بس هو متدرب ماشاء الله عليه ينقز عن كثير من الانبراشات الغاشمة،بس هم عارفين انه مع جية الصيف راح يشتغل بنص ماكينة وعاد حلها لاطفى ويليهامسون،الصيف جاي وراح نشوف (ماعليش هاليومين صرت خبير ارصاد جوية واعشاب)