دكاترة جبابرة

بعض دكاترة جامعاتنا أقطع ذراعي إن كان سمع بشي اسمه حقوق الإنسان، وما فيه طالب جامعي ما شاف وسمع عن تصرفات بعض دكاترة الجامعات غير المنطقية وغير المعقولة، واللي لا يمكن تصير في أي بلد ثاني، من عرفنا الجامعات وحنا نسمع عن غطرسة (بعض) الدكاترة في جامعاتنا، وللأسف ما عمرنا سمعنا إن فيه مدرس في الجامعة تم التحقيق معه عشان خطأ فادح، وش يبرر لدكتور في الجامعة إنه يقول لطالب من أول يوم دراسي: أنت ساقط عندي، وفعلا بعد سنة دراسية كاملة أو ترم كامل يلاقي الطالب نفسه ساقط، كثير من الطلبة اشتكوا لإدارة جامعاتهم من إهانة دكتور لهم إهانات غير إنسانية ولا يقبلها مسلم، وش كان رد إدارة الجامعة؟ قامت عطت ورقة الشكوى اللي فيها أسماء الطلاب وتوقيعاتهم لنفس الدكتور عشان يحطهم مع الساقطين آخر الترم، ليش داسين روسنا في الرمل عن اللي يصير في جامعاتنا من تصرفات بعض الدكاترة؟ انتم حاطين حقوق إنسان تحمي أي مظلوم، ليه ما تشوفون اللي صاير من بعض الدكاترة اللي ضيعوا مستقبل طلبة كثير، وتزعلون إذا جاء ترتيب جامعاتنا في الأخير، تزعلون ليش ما يتطور التعليم عندنا، تزعلون إذا قلنا إننا راح نبطي وحنا نراوح في مؤخرة العالم الثالث، إذا كان دكتور في الجامعة يدرس طلبة من أبناء بلده يسقط وينجح الطلاب على حسب مزاجه ولا يكلف نفسه يشوف أوراق إجاباتهم، وش ترجون منه بعد كذا.