نهاية العالم!

اعرف أنكم مغثوثين ومدبولة كبودكم من الأخبار اللي تجي من ضحايا سيول جدة الله يرحم الموتى ويجبر عزا اهلهم، فقلت يا ولد يابو العريف جب لك سالفة ثانية بدل ما تقعد تهايط على غير سنع ولا احد جايب خبرك، ما تلاحظون يا اخوان ان اكثرنا صاير زي العجوز اللي ماعندها شغلة وتدور أي أحد يكذب عليها وتكذب عليه، نصدق أي شي ونسولف أي شي، وكل هذا بسبب هالفوضى اللي صايرة بالنت والقنوات الفضائية، صارت عقولنا أصغر من عقول البزارين، تجلس بمجلس صاك باكثر من عشرين شنب يسولفون عن نهاية العالم، وكل شنب يبي باقي الاشناب تسكت وتسمع سالفته، وكلن يقوي صوته عشان يغطي على الباقين، واللي يفقد الامل يخم اللي جنبه ويسولف له، تسمع الاصوات كنك تسمع بواري سياراتنا اذا ولعت الاشارة، تسمع مهايط الاشناب ولاغمضت عيونك كنك تسمع قناة سبيس تون، منشغلين ومضيعين وقتهم بسوالف المشعوذين والدجالين عن نهاية العالم، وكلن يمدح الكتاب أو المشعوذ اللي يروي عنه المعلومة وكنه واحد من قرايبه ويعرفه زين، تاركين بزارينهم يتصرمحون بالشوارع ومنشغلين يحللون حقايق ومصداقية نهاية العالم، تشفق على هالناس المسكينة اللي تحب تسولف بالغرايب والاساطير والكلام الفاضي، ناس مكبوته ماعندها لاشغله ولامشغلة يبون الوقت يمشي حتى لو بسوالف تعتبر نوع تلبيق المخ باقرب محطة عشان نحتفظ فيه اذا جينا نخترع محطة فضاء (الاخ شارب ديزل؟ وش هالكلام؟)، ما غير تسمع محالفهم كنهم يتكلمون في حراج بن قاسم، اللي يحلف ان نهاية العام 2012 واللي يحلف ان الحرب العالمية السنة الجاية، ونهاية العالم لك يامسكين اذا مت، وش دخلك بغيرك، فعلا عالم فاضية!