المقاريد !

المقاريد جمع مقرود وهو الإنسان اللي حظه ميح، يعني من وين ماطقها عوجا، والحقيقة اللي ودي أقولها ومستحي أسوي نفسي افهم واحد، مع اني احب يقول عني الناس افهم واحد بالعالم، بس ماش، دايم يطلع بالمجلس واحد افهم مني واضطر اروح مجلس ثاني اقوم اهايط على كيفي، ماعلينا، لاتطلعونا برا السالفة، ياحبكم لتضييع سالفة الواحد، سبحان الله فيه ناس حياتهم متلعوزه وش ماسووا الامور تنقلب فوق روسهم بالاخير، وفيه عندي ياخوان نصيحة (ياحبك لتوزيع النصايح) ان ماستفدتوا منها لا تسموني ابو العريف، واجيكم بكره حالق نص شنبي وتارك النص الثاني، كني محلق عند حلاق احول ومحلقني بدريل، اول ما تحس ان الدنيا معطيتك على جبهتك، وكل سالفة تنقلب فوق راسك، وان مشى لك شي مايمشي الا بطلعة الروح، قلة التوفيق أو القرادة لازم أول شي تعالجه في نفسك، يعني لا يمكن يتغير شي ان ماغيرت انت اللي بنفسك (ياروحي على الفلسفة)، ولازم الواحد يكون عارف ان اي شي يصيبه هو قدر من رب العالمين، ورب العالمين تراه ارحم من الام على ولدها، يعني هو سبحانه أكرم وأجل من انه يقدّر عليك شر لمجرد الشر، يعني وانا اخوك أول ماتجيك قرادة احمد الله على كل حال، واجلس بينك وبين نفسك، واترك عنك بعض الخنبقات اللي ما ترضي الله سبحانه، ترى المعاصي هي سبب النكبات، واترك الحسد، والله ان الحسود لا يمكن يوفقه ربي وش ماسوى، اللي بس يعدد وش عند فلان وعلان ماراح يبهدل غير نفسه، نصيحة من أخو لكم عاصي يرجي رحمة ربه بهالايام الفضيلة اتركوا الحسد..