وكالات سبهلل

ما فيه مواطن سعودي ما هي طالعة روحه من فعايل وكالات السيارات معاه، والضمان وما الضمان لا دخلت بسوالفه ما تخلص غير طالعة روحك، تجيهم فرحان ومبسوط انك شاري سيارة وكالة، وهالايام قليل من يقدر يشتري سيارة وكالة، حسبي الله على الاسهم ومن اخترع السهم الاحمر، تجي مشخص للوكالة على اساس انك مواطن لك قيمة ولابس ثياب جديدة ومسكر الياقة من زود التشخص، وبعد خمس دقايق من دخول الوكالة تنصدم بالوضع، ما نت لاقي احد يحس بمعاناتك وحاجتك لسيارتك، تحاول تستعرض عليهم بسوالف حقوق الزبون وما الزبون بس تلاقي عالم كل ما كثرت عليهم الهرج كل ماسفهوك اكثر، تفلسف وتصايح: يا ناس ياعالم انا سيارتي جديدة ولا يمديها تخرب، اكيد ان العيب من المصنع مو مني، يا غيروها لي يا صلحوها، ومن تنطق كلمة صلحوها تدخل بسالفة جديدة، راح يعطونك فاتورة اكثر اللي فيها ما له دخل بالعطل الاساسي اللي بسيارتك، لان العطل بقدرة قادر صار ما هو داخل الضمان، وبعد ما يشوفونك مصمم ان العطل من الضمان، يقولون لك خل سيارتك وتعال بعد عشر ايام، ويوم تفكر بالعشر ايام بدون سيارة تلاقي نفسك دافع اكثر ومتبهدل اكثر وما لك الا تنوخ زي البعير وتستسلم للي هم يبون، وكالات السيارات اللي ما يستخدمها الفي اي بي وكالات اي كلام، ومثل قلّتها، ومحتاجة رقابة صارمة لأن الوضع عندهم بصراحة (سبهلل)!