امحق (استئصال)!

الحين الجرايد والاطبا (ماودي احط همزه بعد كلمة اطبا.. عقدني مدرس العربي، مصع اذاني لاني مو راضي احط همزه بعد الالف لمثل هالكلمات.. اطبا.. سما.. بذمتكم وش نستفيد من هالهمزة.. بس صرف حروف على الفاضي.. وعشان مدرس العربي الحقنة هجيت ورحت قسم علمي.. لاحط همزه ولاحط سكون).. ايه وش كنا نقول.. كنا نحكي عن الاطباء والجرايد.. مدري شفيهم.. كنهم متوقعين ان الناس ماتحوم كبودهم من بعض المناظر الشينة اللي تحوم الكبد، ترى هالايام الناس كبودها حايمة بدون شي، الغبار الله يخارجنا خلا خشومنا كنها سفنج مكيف مليان رمل، ومع هالغبار النفس والكبد حايمات كنهم مراوح هيلوكبتر.. مدري شلون اكتبها.. ذيك اللي يقولون تطفي الحرايق الكبيرة نسمع بها ولانشوفها.. الله يبعد الحرايق عنا وعن بلدنا قولوا آمين (الأخ قلب عجوز).. كل يوم والثاني حاطة الجرايد استئصال الورم الفلاني.. ومن زين الطبايع يحطون لك صورة الورم اللي هم شالوه.. يا ربي دخيلك.. صورة اتحداك تطالع فيها دقيقتين.. تلوع الكبد.. مدري وش الجديد بصورة ورم.. حاجة مكلعكة وسودا وتخرع.. وش الفايدة من نشر صورة الورم المستأصل والا صورة حصوات الكلى او المرارة.. اذا كان تبون تبينون لنا الحجم ياخي ارسموها رسم وحنا نعرف الحجم عشان نتهول ونعرف قد ايش تعبتوا عشان تشيلونه وانكم اطبا ما فيه زيكم بالكرة الارضية.. نطالب وزارة الصحة انهم يرحمون كبودنا الحايمة ويمنعون نشر صور الورم المستأصل.. الله لا يبلانا!