صالات الطق والطقيق!

أعزائي فرق وجماهير الصالات المغلقة، بخصوص انكم مستحيل تعدون مباراة وحدة بدون طق وطقيق، نطلب لكم قوات حفظ سلام مثلا؟
ماصارت رياضة يالحبيب انت واياه، اقل احتكاك بين أي لاعبين يتحول لاشتباك، والاشتباك يتحول لمطاقة، والمطاقة يدخلون فيها الفريقين فازعين لاخوياهم، وتلاقي واحد بس اللي يفك بينهم وبعد شوي يجي بوقس ماتدري من وين، ويقول ياولد مايبي لها.. عليهم يالربع، عليهم.. عليهم!
انا اتوقع كوكب «اكشن» اللي في قناة سبيس تون راح يتقدم رسميا بطلب النقل الحصري لمباريات الدوري اعتبارا من الموسم الجاي، وموب بعيدة يرسل اتحاد الكاراتيه خبراء يحضرون المباريات لدراسة إمكانية عقد شراكة بينهم وبين اتحاد كرة اليد!
لا من جد وش السالفة، يعني عشان المباريات ما هي منقولة، واللعبة ما يتابعها أحد تقريبا، يتحول الملعب لساحة معركة، وتصير تغطياتها الصحفية كلها صور تجيب الهم.. ياصحفي مكسورة يده، ياحكم محاصر بقوات أمن، يامشجعين متلاقطين بعصي!
المشكلة ان هالموضوع ماصار مرة والا مرتين، لكنه تكرر كثير في ملاعبنا.. يعني ودك فعلا يسوون دراسة ويعرفون وش السبب، حتى لو اكتشفوا ان الجماعة مخنوقين من الصالة المغلقة وحابين يطلعون حرتهم ببعض، عادي.. نسوي لهم فتحة في السقف.. خلهم يتنفسون ياعم!