مبروك..ولدك ما انسرق!

وش سالفة المواليد اللي ينسرقون يالربع؟ ترا حسبت الدعوة مزح في البداية بس العلم وصلني وتعداني، وياليت بعد كذا نتعامل بمسؤولية مع هالموضوع، والواحد فينا يحرص ويتعاقد مع شركة أمنية اذا بينتظر مولود، ايه ياحبيبي ترا فلذات اكبادنا ماهم لعبة «ياقدم هالكلمة» والاقدم انك تسوي زي المسلسلات وتجلس تفر الممر رايح جاي وقلقان وحالتك حالة الين تطلع لك ممرضة وتقول لك «مبروك جا لك ولد».. الفرق الوحيد انها الحين مابتكون شايلته لك زي العادة.. لكن بتعلمك باللي صار بكل وضوح وشفافية لأن هالأمور مافيها لف ودوران «شوف.. هو من ناحية جالك ولد.. اقدر أأكد لك هالشي، لكن وين اختفى بعدها الله اعلم»!
اللي مو فاهمه انا الحين، لو فرضا – لاسمح الله يعني - انسرق الولد، هل مفروض الاب يبلغ الشرطة؟ واذا بلغهم بيطلبون منه مواصفات؟ طيب كيف وهو اصلا ماشافه.. والله ياهي ورطة، لا والمشكلة اذا قال لك شاك بأحد؟ ولو انها ماتجي شي لو قال لك العسكري مثلا «خلاص عممنا عليه» ويصير بدل ماتروح تشتري له «حليب» يقولون لك رح دور عليه في «لبن». لكن اذا الله اكرمك ورزقك بولد.. فالفرحة ماتكمل الا يوم تقضبه من شرشفه وتوقع صك استلام.. وتنزل خبر من بكرة «رزق فلان بمولود جميل.. وقد نجح في الحصول عليه.. تهانينا»!.