برسونالات!

لما يكون عندك مساحة في أي مكان، خصوصا في المواقع الاجتماعية أو معلوماتك في أي جهاز أو برنامج محادثة.. تحب تكتب جملة تعبر عنك، أو تختصر اللي تفكر فيه، تحرص دائما انك تقول شي جميل..في واحد يحط بيت شعر، واحد يحط جملة مشهورة لمفكر أو فيلسوف، كل واحد عاد وشخصيته واهتماماته وعقليته.. وعشان كذا كل جملة تقراها راح تدلك بشكل كبير على الشخص اللي وراها.
لكن تعالوا نشوف اللي عندنا ، تلاقي مليون وحدة كاتبة «يقولون مغرورة قلت يا بخت الغرور فيني.. واشلون ما اغتر وعندي من يموت فيني».. عسى ما شر، يعني عشان اخلي الناس تحترمني لازم اهايط شوي، لكن مو مشكلة لو عرفوا بالمرة ان اقصى شي ابيه في الحياة هو شخص يحبني وبعدها ترا بشوف نفسي على العالم!
والا يجيك الاخ الكريم كاتب «صمتي» لا يعني جهلي بما يدور حولي، لكن ما يدور حولي لا يستحق الكلام..لا تكفى تكلم يا أرسطو، الله يخليك حاول منا والا منا.. البشرية على اعصابها منتظرة تعليقك ترا..!
ذكرني باللي عمره 10 سنوات ويكتب «ليه يازمن خذت مني اللي احبه» ويجي صديقه ابو 12 سنة ويقوله «معليش الدنيا كلها جروح والم» وعلى قولة خوينا.. «انا لما كنت في عمرك انت واياه كان كل همي اصلح جنزير السيكل!»