الانسان الرمضاني!

كلها كم يوم ويكون شهر رمضان الكريم داخل علينا الله يعيده علينا وعلى جميع المسلمين بالخير، وتستغرب سبحان الله ان فيه نوعين من الناس يطلعون لك في هالشهر الفضيل، هذاك المتلطم اللي ما تقدر تقوله كيف الحال الا وهو ماسك حلقك هواش بزعم اني صايم ومتعبني الصيام، يطلع صيامه فوق راسك، تدخل بأي مكان فيه مراجعين تلاقي نصهم الله لا يبلانا معبسين كنهم توهم واصلين من طريق بر، ودايم الناس تكتب وتنقد هالنوع بس ماش، الظاهر ان الواحد اذا جاع تضيق اخلاقه، وفيه النوع الثاني اللي ما يعرفون الصلاة بالجماعة الا اذا جاء رمضان، تلاقي حرصهم عليها بس لا جاء رمضان، مع ان هالنوع اشوى من اللي قبله، على الاقل فرصه انه يجرب ان الصلاة والانتظام فيها مو صعب زي ما كان يتخيل، ترى رمضان فرصة ان الواحد يراجع اوراقه، لان هالشهر الكريم شهر تسامح، فرصة ان الواحد يتسامح، ويفكر ان الدنيا ما تسوى، شف كم راح من عمرك، طار زي البرق، واللي جاي من عمرك راح يطير زي البرق، يعني الحياة اسهل بكثير من هالعقد اللي حنا عايشين فيها، لا تعقدون انفسكم وتطاردون ورى الدنيا وبالأخير تطلعون منها ما كسبتم غير عمل الخير والنية الطيبة اللي تعاملتم فيها مع غيركم، خلكم ريلاكس، وكول، وبلاش من العصبية!