فحم وحطب

بالبلدي الفصيح

ايشبك كدا ياسيدي لونك صار أسود وتوبك معدوم وحالتك حالة وايش دا اللي جايبوو معاك انت حتبيع وتشتري في الحطب والفحم والكوانين والا ايش؟، يابنت الحلال ابلعي ريقك من ساعة ما تشوفيني على طول كدا بللم بللم بللم استهدي بالله وانا أفهمك الحكاية . قول ياسيدي ايش الحكاية؟ .. اشتريت الفحم والحطب دا عشان ياستي خلاص ما عاد نبغى نستخدم أنبوبة الغاز بالمرة حنسوي فطورنا وغدانا وعشانا وبراريد الشاهي على الفحم والحطب، وبيني وبينك حتاكلي أكل وتشربي شاهي ما قد دقتي زيوو طول عمرك مافي أحلى ولا أطعم من الطبيخ على الفحم والحطب واسألي مجرب وفكينا وريحينا من أنبوبة الغاز وشيلها وحطها واللي ما يجي من وراها إلا البلاوي والمصايب والدمار وكفاية اللي حصل في شرق الرياض.. ناقلة غاز أتهرب منها الغاز وحصل من تحت راسها اللي حصل انفجارات ودمار للممتلكات وسيارات انحرقت وناس ماتت نسأل الله سبحانه وتعالى أن يغفر لهم ويرحمهم.. لكن السؤال اللي يسدح نفسه هو : اليين متى وشركات الغاز تكون متواجدة وسط الأحياء السكنية زي شركة الغاز اللي في جدة لانه لا سمح الله حصل شي حنقول على هادول السكان اللي ساكنين في كيلو 14 ومشروع الامير فواز وسكان الخط السريع الله يرحمهم لانه شاحنات الغاز حق هادي الشركة بتلف وتدور نهار وليل وهية شايلة الآلاف من أنابيب الغاز ولو حصل لها لا سمح الله أقل حادث حتنفجر وحيصير دمار للبلد ، هدا غير انه في بعض العماير والشقق فيها توصيلات للغاز المركزي وربنا يلطف ويستر على سكانها لأنها قنبلة موقوتة لانه لو حصل أي تسريب أو تهريب للغاز حتدمر العماير باللي فيها .. عشان كده بقول لكل الحبايب ترى الفحم والحطب والبتوقاز الكهربائي فيه أمان أكتر من أنابيب الغاز اللي ما يجي من وراها إلا المصايب والدمار .. وربنا يحفظنا ويحفظكم من كل سوء .. وعيشوا كتيييييير تشوفوا كتيييييير.
هرجة: يا مسؤولي شركات الغاز انقلوا شركاتكم وقنابل الغاز بعيدا عن الأحياء السكنية قبل لا تجي الفأس في الراس.
abofatoo@hotmail.com