فصين توم

بالبلدي الفصيح

ما شاء الله عليك يا سيدي جبت المقاضي كلها؟ أيوه يا ستي كل المقاضي اللي قلتي عليها جبتها.. ايش ده يبو فتو جايب من كل نوع حبتين بس؟ الطماطم حبتين والخيار حبتين والكوسة حبتين والبامية شوية والفاصوليا شوية والفلفل الأخضر شوية وايش ده كمان اللي في القرطاس؟ هدا يا ستي كم فص توم.. ليه كده متعب نفسك يا سيدي حتقعد كل يوم تجييب زي كده كنت اشتريت بالكيلو عشان ترتاح؟ بالكيلو مررة وحدة وأسعار الخضار نار بالشكل ده ... أيوه بالكيلوو والا عاجبك وجع القلب والروحة والجية؟ اللهم إني صايم يا حرمة ابلعي ريقك ايش هوه ده بللم بللم بللم بللم جبتيلي الصمرقع في دماغي استهدي بالله وصلي على النبي واجلسي وانا أفهمك الحكاية من طقطق لسلام عليكم وقبل لا أفهمك الحكاية اعطيني شوية من الرقاق ده عشان أساعدك في لف السمبووسة انتي لفي باللحمة وانا ح ألف بالجبنة اسمعي يا ستي رحت عند بياع الخضار اللي جنب البيت وسألتو بكم الكوسه قال الكيلو ب 18 ريال والخيار ب 10 ريال والبامية ب 25 ريال والفاصوليا الخضراء ب 12 ريال وصندوق الطماطم ب 20 ريال ولما جيت سألتو عن التوم تدري كم قلي يا أم فتوو؟ كم يا سيدي ؟ ب 15 ريال وقبل رمضان بيوم كان سعر الكيس ب 4 ريال وإذا ضربتوا الحمى يوصل ل 6 ريال طيب ليه يا سيدي هادول البياعين بيرفعوا كده في الأسعار ؟ لانه ياستي هادول التجار والعمالة الوافدة اللي مكوشين على حلقة الخضار محد قادر عليهم محتكرين هادي الخضروات ويبيعوا لأصحاب الدكاكين بالسعر اللي يعجبهم وهما السبب في رفع أسعار هادي الحاجات اللي قلتلك عليها ومو معقول كمان انه صاحب الدكان الغلبان يبيع بخسارة وزي منتي عارفة الرقابة على الأسواق عندنا ماشية زي الفل والمفتشين اللي ينعدوا على الأصابع شايفين شغلهم صح عشان كده التجار جالسين يلعبوا في السوق زي ما يبغوا لا حسيب ولا رقييب وحماية المستهلك سكتم بكتم لا حس ولا خبر حتى ما يردوا على تلفونات الأوادم اللي يبغوا يشتكوا من زيادة الأسعار لا والمصيبة مو هنا المصيبة لما تشوفي تصريحات وزارة التجارة قبل رمضان وتقري خبرهم اللي مكتوب بالبنط العريض (أسعار المواد الغذائية والخضار تحت السيطرة) وكله كلام جرايد لا يودي ولا يجييب لكن لو في رقابة وتفتيش وغرامات على هادول التجار محد منهم يقدر يرفع السعر لكن الحكاية كلها (كل مين إيدو إلوو) ونحنا الغلابا نروح فطيس من تحت راس هادول التجار اللي ما في قلوبهم رحمة على عباد الله لا وهدا ونحنا في شهر فضيل ما تفرق معاهم حلال حرام ما يهم كانه الغلابا اللي في البلد ناقصهم مصاريف وهم وغم.. فين حتروحوا يا تجار من كلام العزيز الجبار يقول الله عز وجل في قرآنه الكريم (ويل للمطففين، الذين إذا اكتالوا على الناس يستوفون، وإذا كالوهم أو وزنوهم يخسرون) يا تجار خافوا الله في عباد الله.. والله ما حتاخدوا من الدنيا دي شي وكل اللي حتاخدوه معاكم حفره ومتر قماش وقطنة.. وهادي يا ستي الحكاية من أولها لآخرها ودحين شيلي من قدامي ده الرقاق أحس أصابيعي اتعروجت من كتر لف السمبوووسة، واللهم إني صائم، وعيشوا كتييييير تشوفوا كتيييييير.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة