حمال الثقيلات

قصيدة مثقلة بالحزن لرحيل سلطان الخير، نسجها الشاعر ناصر بن حمود قعيد السبيعي بصدق، معبرا عن الأسى الذي عاشه الشعب السعودي فور سماعه بالخبر.
سلطان مات ومجد سلطان ما مات
يبقى مخلد مجد سلطان دايم
يالله يا فارض علينا الصلوات
تجزاه بالجنة وبرد النسايم
واحسن عزانا في زعيم المهمات
رجل المواقف والفعول العظايم
من صغر سنه مرتكي للثقيلات
عليه من صقر الجزيرة علايم
درع الوطن عند الظروف الصعيبات
ستر الوطن عن كل بايع وسايم
غيث الوطن والشعب في كل الأوقات
عون لمن ضامه من الوقت ضايم
كف الندى رمز الصخا طيب الذات
غيث هماليله سرور وغنايم
للخير في وجهه رسوم وعلامات
منصي لمن يشكي العنا والهضايم
له في فعول الخير صوله وجولات
وله في الكرم والطيب ساس وقدايم
فقده علينا صعب سلطان بالذات
حبه كبير ولا لنا فيه لايم
ويالله يا فارض علينا الصلوات
تجزاه بالجنة وبرد النسايم