دحين انت من ساعة ما قفلت الجريدة وانت جالس تخبط أخماس في أسداس ايش اللي حصل فهمني؟، أفهمك ايه؟، والا أقول لك ايه؟، اللي كنت خايف منه حصل واللي كان كان، راحت جدة القديمة بتاريخها وما عاد لها قيمة، الله يكافي اللي كان السبب، من جد شي يوجع القلب ويرفع الضغط ويجيب السكر خلاص ما عاد ينفع الكلام واللي أتكسر عمره ما يتصلح.. ياسيدي ايش اللي حصل فهمني؟، شوفي الجريدة وشوفي الخبر اللي يوجع القلب ايش بيقول (تحفظت منظمة اليونسكو العالمية على إدراج جدة التاريخية ضمن قائمة التراث العالمي بعد قرار المجلس الدولي للمعالم والمواقع الأثرية «الأيكومس) آآآآه ياجدة تعبت وأنا أزعق الييين حلقي انشقر وأنا أقول ياناس يا مسؤولي أمانة جدة، يامسؤولي هيئة السياحة والآثار خلو بالكم من جدة القديمة خلو بالكم من بيوتها ومن شوارعها ومن أزقتها ومن دخاشيشها اللي عمرها أكتر من 200 سنة هدا تاريخ جدة ولازم نحافظ عليه مافي فايدة الين جات الفاس في الراس وتحفظ منظمة اليونسكو شاهد على إهمالنا وتقصيرنا في المحافظة على تاريخ جدة القديم، ملايين الريالات بتصرف عشان نحافظ على تاريخ جدة فين راحت، وبعدين أي منطقة تاريخية بيتكلموا عليها وهما عارفين أيش فيها من بلاوي، بيوت مهدمة، وشوارع وأزقة وأرصفة مكسرة، ومجاري طافحة، وأعداد مخيفة من الفيران اللي استوطنت في جدة القديمة، كم مرة ولعت النيران في جدة القديمة وراحت بيوت أثرية عمرها أكتر من 200 سنة وبيت الوجيه باعشن أكبر دليل على الإهمال اللي حاصل في جدة القديمة هدا غير بيت باعوضة الأثري اللي انحرق قبل أربعة أشهر، أكتر من 200 منزل مفقود، هدا غير انه عدد البيوت في المنطقة التاريخية وصل ل 550 بيت ومن 25 سنة انهار وانحرق اكتر من 60 بيت، ومن فترة سنتين بس حصل أكتر من 13 انهيار وحريق في بيوت جدة القديمة. ادخلوا وشوفوا حركة السيارات خاصة سيارات النقل في أزقتها ليل نهار، شوفوا ساكنيها من العمالة الوافدة اللي بهدلوها وبهدلوا كيانها، شوفوا كيف بيوتها تحولت كلها إلى مستودعات للأقمشة وأكياس الخيش والطراطيع والمفرقعات، عن أي منطقة تاريخية بيتكلموا ؟ واللي محيرني سكوت هيئة السياحة والآثار السعودية على هدا الإهمال اللي جالس بيصير في المنطقة التاريخية عشان كدا بقول لأمانة جدة ولهيئة السياحة والآثار دخيلكم لأجل الله حافظوا على الباقي من تاريخ جدة القديمة وشوفوا كيف في بعض البلدان العربية والأوروبية بيحافظوا على تاريخهم القديم واللي بيكسبوا منه ملايين الدولارات عشان عرفوا يستثمروا هادي المناطق التاريخية صح، عشان كدا بقول لازم المنطقة التاريخية تتسور وتتنظف من كل اللي فيها عشان نحافظ على الباقي من تاريخ وعراقة جدة . [email protected] للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة
