الهواوي

ليت الاحباب بالاشعار ما اذاعت
غير للي تحشمها وتكرمها
الهواوي طواريقه اليا انداعت
ودك ان الهنوف اللي تطعمها
غروة كل ما نادى اسمها طاعت
تسبق الصوت بخطاها لزاهمها
مع دروب الهوى والغي ما تاعت
حفظت نفسها لين الله اكرمها
الي طلباتها عين الرضا انصاعت
كل ما قال قال اموت ما اعدمها
كل ما ابطى وهو ما كلم ارتاعت
وكل ماخاف لاترتاع كلمها
داوت جروحه اللي قبلها التاعت
لو يبا عيونها يمكن تقدمها
تذبح هموم صدره كل ما شاعت
ومن حلاها ومن كثرة تنعمها
مدري الشوكلاته كيف ما ماعت
من حرارة يديها يوم تلزمها
ما شرت بين خلق الله ولا باعت
بالسوالف ولا ضاعت مكارمها
كل ما اذنه لحلو هروجها جاعت
عوضت عينه بروعة تبسمها
يحسب ان الهروج الناعمه ضاعت
واثرها ماتبا المطلاع من فمها
سعود الدهيمي