قومي ارقصي يابلادي

يسعدك مسا العيد لأقبل واكتسى فرحه
للعيد مقيال وسط الدار ومراحي
في دار قمة جبلها عانقت سفحه
والبحر غنى يشاركها با لأفراحي
في دار من عا الخلايق معتلي قدحه
الشامخ اللي تقصر دونه أمداحي
لأجل الوطن شاد مجد رأسي صرحه
لا طاحت أمجاد مجد الدار ما طاحي
مجد إذا الليل يسدل على البشر جنحه
نلقى لنا في ظلامه ضي وأصباحي
صقر العروبة وشعري ما وفى مدحه
يا كيف والمدح لا بس باسمه وشاحي
الله يديمه لنا ويتتم الفرحه
في عودة اللي عليه الدمع سحاحي
من غاب والدار في رجوى متى صبحه
يشرق عليها وتزهى به تبجاحي
في صحته للمواطن والوطن صحه
وأبهج من العيد لا من بينا لاحي
قومي ارقصي يابلادي وارمي الطرحه
وعيشي فرح من قبل لاجى ولا راحي
فلي جدايل غلاك ووردك ونفحه
والعود الأزرق يكملها ليا فاحي
قولي لهم ليل حزني داهمه صبحه
وبروق حبه تقاصف والهنا لاحي
يا عيد من جيت وأيدي تفرك السبحه
كاني اترجم مشاعر عبر مسباحي
لو جيت ابشرح شعوري طال بي شرحه
ولا يوفي غلاه أموال وأرباحي
يا عيد فيك الحمام ملاحق نوحه
شوقه لشوفة سموه بالشجن ناحي
وأقبلت مثله بشوقي مكتسي فرحه
ودي أشارك هلي في عيد وأفراحي
من جيت يا أمير وكل أيامنا فرحه
في دار للعز فيها فرش ومراحي