وجه الطريق

على وجه الطريق اللي من أرهاق السفر ملفوح
سراديب الظلام تحاكي الساري عن السيره
وأنا ومعاتب الدنيا بقصة منهو المكدوح
وحل الليل في وجه القتيل وزبن الجيره
هلا بالليل دام الليل للعشاق ستر البوح
هلا به كثر ما باها صباحه في عصافيره
تفضل واسدل ستارك بسر(ن) بات لك مفضوح
عجز عنه الكلام وخانت حروفه وتعبيره
يا ستر أسرار خلق الله خطايا غيبتك مدموح
وأنا لولا الغلى ما سقت لقدومك تباشيره
عشقتك ليل وأبديتك خفايا قلبي المجروح
ولي في وسط صدرك فضل تهليله وتكبيره
أنا ياليل وش لي من بقايا صوتي المبحوح
إذا حتى صدى صوتي أفل ماعاد له ديره
دخيل الله من حمل(ن) يشرح ضامر(ن) مشروح
كريم الكف من فقره سعوا ربعه لتصغيره
على ويش الجفاء ياحظ والشاقي شقاه يلوح
بكف (ن) دامية ترقى الصبر ومجامل الحيره
وعلى ويش الضمى جرح لهات الضامي المكبوح
يعيش بلهفة الضامي ولا يارد على بيره
أبصبر لو سراب المي في عين الضرير يفوح
وبأجعل صدري الملفى لهم(ن) طال تدويره
الحسن العامر