سلمان.. سيّد سادة اللي يسودك

لا صار.. مُهرك.. ما عنانه.. بيمناك
تراك ما أنت بقايده.. هو يقودك
يحوم بك.. وإن جاع ينهش خفاياك
وإليا ظما.. فتّق مغالق.. لهودك
إن كان ظنك.. يرحمك.. من تولاك
خايل ظنونك.. لين تذبل ورودك
نوب ابن عمك.. لا تولاك.. ياطاك
وش عاد لاشٍ ما جدوده جدودك
لا ديرته.. ديرة هلك.. لا نواياك
هي مبتغاه.. ولا حدوده حدودك
لاشٍ حسب نفسه جذب غيم واسقاك
لو غافلك.. شلّع منابيت عودك
بقعا غشتك.. وروحك اليوم.. تنخاك
افزع.. لها.. لا غيّب الله حسودك
يا ما وفا.. جودك.. لهذا.. وهذاك
يا كبرها.. وإن خان جودك وجودك
لا تستكين.. وهامة الظلع.. مرباك
والسبع يركض في مفاتل زنودك
هش الردي عن هيبتك.. روحي فداك
خسّه.. وعقب لحيته.. لا يكودك
قلّه.. تشيب من الرجا.. ما وردناك
وإذا وردناك.. استبحنا عدودك
حنّا جنود اللي ملك.. ماك و رشاك
سلمان.. سيّد سادة اللي يسودك