كنا وكانوا

والغلا بين ايدينا
والشوق غصنٍ مثمر ونهر جاري
وراحوا ورحنا واغتنوا واغتنينا
ماعاد للوقت الذي راح طاري
منهم أخذنا كثر ما قد عطينا
ماهي مزايد بين بايع وشاري
ود ومحبة ولوفاهم وفينا
يوم الوفا بالعهد شرط اختياري
لا هم سعوا للبعد واِلا سعينا
ومابيننا اللي بالمقادير داري
أيام، يا تضحك لنا أو علينا
وظروف لا ترحم ولاهي تداري
دنيا تثور امواجها لا رسينا
وتجنح مراكبنا بليا صواري
واذا انحذف طوق النجاة ونجينا
على أمان الشط تطري طواري
ماكان نتناساه لو ما نسينا
تغير - لاِكمال الطريق - اضطراري
كنه منامٍ منه فجأه صحينا
والا أثر مرت عليه الذواري
ماكننا عشنا عمر واهتنينا
غصنٍ من اوراقه غدا شبه عاري
كنا وكانو وانتهوا وانتهينا
وماعاد للوقت الذي كان طاري