الوقت

فكرت بالوقت وهجوسي رحاها تدور
وعينت بالناس حاسدها وختالها
اقبلت كلي وفاء ووجيه الاصحاب بور
وبعض الأصاحيب فال الله ولا فالها
من وين ابا القى رفيقٍ بالقسى له حضور
وقليل من يحتمي كلمته لا قالها
ان كان غريت من خوة طوال الشبور
تراك في حالةٍ صعبه ويرثى لها
الرجل ودك على العليا طموح وجسور
وان ما تهيت على شفه تهيا لها
ولا صار ماهو على دينه وعرضه غيور
لا عاد تشره على لحيته وسبالها
عينك على كل ما يرفعك في كل دور
ترى الرجاجيل تعرفها من افعالها
ولا كل من يبتسم لك صادقٍ بالشعور
احيان من يعشق الحيلات يحتالها
مابين اول ظهور وبين اخر ظهور
تشوف ما يخلف العقال واحوالها
لو كان بالعين نكشف ما تكن الصدور
كان اكثر الناس ما عاشت مع عيالها
غير الذهب كل عمله لو وفت لك تبور
يطيح عنها القناع وينكشف حالها
اهل الوفا والمروه في بطون القبور
ودروبهم مع جبال صعب محوالها
والادمي ضيف والدنيا محطة عبور
يسعى عليها وموت النفس يسعالها
الناس مفتونةٍ فيها وتبني قصور
مقفين عنها وطمعتهم على اقبالها
واصحاب الالباب ما تخفى عليها الامور
تعيش لكن نهايتها تورا لها
وين افضل الخلق واصحابه وكل العصور
اللي خلت ما نفعها طيب منزالها
لو كان فيها يدوم العمر بسط وسرور
ولا فيه فرحه صروف الوقت تغتالها
ما قال عنها مكونها متاع الغرور
يا مخبل اللي عليها تبني أمالها