نبض الخفوق

مشيت دربك طول الأيام رحال
يوم المسافة مالها غير شاعرك
وجيتك أسوق الشوق غايات وآمال
ماهمني ياكود صادق مشاعرك
ولو اليالي كلها فيك غربال
تهون في عيني على شان خاطرك !!
غلاك باقي ماتغير ولازال
(نبض الخفوق) اللي على طول يذكرك
عديت من شانك على رأس ماطال
وبنجوم ليلي في غيابك اسامرك
وجريت باسمك ياغلا الروح موال
وطوحت صوتي يوم لجت منابرك
وبدعت في وصفك مع الناس الأمثال
بالله قلي .. وش كتبت بدفاترك!!
فيني من أسباب الوله فيك زلزال
تطيح ماتاصل مدآآآه بمحابرك
لو شفت كيف الحب يقضي على الحال
ماكان جفت بالمحبة عبايرك!!
ولو الهوى دايم يجيلك على البال
بقيت في قلبي (وعقلت اباعرك)
شلت الحمول اللي عصت كل رجال
ودست المخاطر .. لو تبيني أذكرك
ضحيت لجلك ما شكيتك للأحوال
ليتك ولو مرة .. تجيني من آخرك
ماقد عصيتك يابعد كل الأزوال
حققت ما تطلب .. ولبيت اوامرك
أدري بك أنك ماتعمدت تحتال
حبيبك اللي لو قسى الوقت عاذرك
قدر المعزة داخلي عز وإجلال
أسال عيوني عن حضورك وتخبرك
هذا شعوري وسط الأعماق يجتال
يهيم في ماضي زمانك وحاضرك
ومدام دربك لو غدا عمري أهبال
بمشيه لو ماته من الشوق .. شاعرك