«غريبة كنت..»

غريبة كلمةٍ تعطي معانيها كذا تفسير
ولكن عندك انطقها غريبة كنت من دونك
تعال اشرح معانيها وكلي أنتظر تغيير
على الضفة مع التفسير تلاقى كوني بكونك
على كيف الزمن تمشي وانا امشي لك على التقدير
أرتب للأمور اكثر..أعاتبها ولا تخونك
ولو جتني جيوش الحرب ولازم اكتب التقرير
بخبرهم عن جيوشك عن سلاحك عن سجونك
انا قلبي يبي دنيا بها راحة بها تنوير
وتجرحني غريبة دار جت تتلون بلونك
كذا نكتب مشاعرنا بلا لف وبلا تدوير
كذا نتنفس الراحة على هوني وعلى هونك
رضينا بالفضا نسكن نضم الشمس قبل الغير
رضينا بالقمر جارٍ يرد الصوت لعيونك
جنون الوقت أتعبني أبي قلبي يعيش بخير
خذه عندك ورجعني بلا قلبي بلا جنونك
أبيك لخافقي دنيا وانا منكم بعيدة سير
بسافر دون خفاقٍ عذلني حالف يصونك