سعة بال

حي الهجوس وداعي القاف يختال
قمرا وليل وريحة البن محبوك
والنار حيّة في غضاها مع دلال
ما دونها سورٍ ولا باب مصكوك
وأهل القلوب اللي معاها سعة بال
مدّت هداياها ورودٍ بلا شوك
ليت النحل وزّع خلاياه لجْيال
يشفي صدور اللي تعاني من شكوك
يا ضايقٍ صدرك على كلّ موّال
ودّي أشوفك رايقٍ غير منهوك
ليت الضماير كلّها طيّبة فال
ساقت قوافل للمحبة وانا خوك
طبع الجمل يصبرعلى حمل الاثقال
واجمالنا يا صاحبي ما هي بروك
ليت النوايا ما تجي واديٍ خال
وتضيع ما تلقى تعاريف وصكوك
ودّي أشق الصدر ويْصير مدهال
مبروك يا صدري عليك الف مبروك
شبيت في ثوب الوهم طال ما طال
ما شفت في لبّاسته ضافي سلوك
ترى الجماله ما تجي بشت وعْقال
والقلب خالي من محبّه ومضنوك