بعض المواقف

خلك على قدك مع الحي يا حي
واجمع مثل تحويشة النمل قوتك
لا تقول تامر شي ما تمتلك شي
افضل من احراجك تفضّل سكوتك
بعض المواقف وضعها يشبه الكي
منّها تمنا قبل لا تصير موتك
ما كل نورٍ لا سطع ينبثق ضي
فيها يجي ضدك لغيرك شموتك
تقول هي وما تجي مثل ماهي
واللي مقدر لك ترى ما يفوتك
الناس فيها السمح والثاني العي
والعي صوته دايمٍ ضد صوتك
واهل الوفاء بالوقت لو صاروا شوي
ابيوتهم ما كنّها الا بيوتك