راحة القلب

يا برك النهار اللي عيوني تشوفك فيه
لو إنها دقائق وقت عجله ومعدوده
تطيب الجروح وراحة القلب في غاليه
وأنا وأنت معنى صادق الود وعهوده
ويا حي الطريق اللي يجيبك لو إن تاليه
دموع الوداع ونبرة الصوت مشدوده
محبة قلوبٍ صادقه والغلا تعطيه
شموخٍ تحدى شدة الوقت وقيوده
على كل حال وصادق الشوق ما تخفيه
قلوبٍ تجاوز شوقها الشوق وحدوده
خذ العلم مني وأنت نصه وما يعنيه
مساحة غلاك أكبر من الشعر وبنوده
تجاوز حدود الصمت واستصغر التنويه
عن الواقع اللي بصمتك فيه موجوده
قناعة عزيمتها تجاوز بحور التيه
لو أن أكثر أمال المحبين مفقوده
تحول الظروف وحكم الأقدار والتوجيه
وتظل الجسور بصادق الود ممدوده