صوت الحمايم

غن يا صوت الحمايم وشد الانتباه
صوب صدرٍ زفرته ما يظهرها خمل
ضايقٍ قدلي من أسبوع مدري من وراه
المهم إنّي لي أيام وأوضاعي ذمل
أرتجي عطفه ولطفه وأمّل في عطاه
وإنه يشملني بعفوه معَ اللي قد شمل
يا وجودي وجد شيخٍ توجّاده فراه
يوم شاف الوقت ضدّه وهو طيّب عمل
انكفت بيض السحايب ولقّته العباه
وادلهمّت في عيونه وهو شيخ الشمل
كل مالديت عيني على سير الحياه
وشفت في بعض الأوادم مثل بعض الهمل
الاتجاه اللي يبونه وعكس الاتجاه
واحدٍ منها رهاوي والآخر في طمل
وأنت مثلك مثل غيرك وبيرك من غطاه
كثرت إحداد السكاكين مع طيح الجمل
وإن بغيت تْواصل اللي ملا صدرك غلاه
لا يردك عن وصاله ظروف ولا زمل
وإن جفاك الوقت والصدر ما بيّح خفاه
سو لظروفك تخطّي ولأصحابك سمل
الردي لو هو تملّق يبيَّن لك رداه
والكفو لا من زهمته على الشده صمل
روس مليانة حميا على درب الدهاه
وروس مليانة رخامة ومليانة قمل