حلم السنين

تعالي لملمي حلم السنين ولعبة الأيام
على انقاضٍ هشيم وخاطر للوصل تواقي
انا ما كنت أظن ان الغياب يكثر الأوهام
وفي بعدك غزاني جيش همك واعطب اعماقي
لك الله يالسنين اللي خذت مني هوى واحلام
ولك الله يالقلوب اللي مع الخذلان تنساقي
زمن يستوطن أقصى جرح فينا والحروف سهام
ويكتبنا قصص فيها الأسى للروح ترياقي
أخذنا في بحور البعد واسكنّا ورى الأجرام
غفى ليل الوصال وتعب صبري واعلن فراقي
غريب الروح كيف يعيش لو جار الزمن وانضام
سهير العين كيف يبات وديونه لها باقي
تعالي قلبي وروحي تراها في الزمن صيام
رجاها في زمان الوصل قبل الوصل ينباقي