سوق واقف

يا سوق واقف جيت من ضيقة البال
والا فلا لي فيك ياسوق حاجه
لا سرت متضايق، تحاشيت الازوال
ما احب تهريج العرب والمواجه
اروح اوسّع خاطري بالتجوال
ايلين يفرجها الولي بانفراجه
واقوم اراجع كل حاجة! بمثقال
وابحث عن الحل السليم وخراجه
ماني بمن سده بلا حصن واقفال
شفاف ما من دونه الا زجاجه
اظهِر ما اريد اقول منّه بمكيال
القول له ميزان والصمت تاجه
والسد ما يبدى على كل رجال
وشرحك الغير الكفو عيب وسماجه
تاتيه متضايق وهو من سعة بال
يبدي على بعض النقاط احتجاجه
كنّه على بعض السواليف دلال
مالك مزاج ورايقٍ له مزاجه
الله يقطع تالية ذكر الانذال
تجمع خفا واترّك ركّ الدجاجه
ماني بمن يبكي على شوف الاطلال
عيني برجوا السيل هو واندراجه
ادري لنا ربٍ كريمٍ ومتعال
عدال ميلات الزمن وانعواجه
في طرف لحظه يبد الحال بالحال
ويركّد عسام الجو عقب العجاجه