رحلة تعب

لا تضيق أخلاقك ويشتعل حلمك حريق
من نزل فعله من العين قدره مارقا
اعتبر نفسك مسافر وهقواتك طريق
لين تقتات السعاده من عيون الشقا
خلّ عزمك للوفا سيف والهامك صديق
العزوم سيوف طاله والاعذار امحقا
لا تفوتك رفقة «ابشر بعزّك يالرفيق»
خلّ رفقة «مرحبابك ودام لك البقا»
من يلدّ العين في بيت الاوهام العتيق
عاش وأحلامه مساجين ويديه اعتقا
لا تقول إن البحر ما رحم دمع الغريق
لدّ عينك في قلوب ٍ بالاوهام اغرقا
النوايا وضح والوضح منهجها يليق
لا تسيّر وضحك الا على وضح النقا
والفخر قمّة جبل والندم وادٍ سحيق
من بقا قلبه على الصدق ف القمّه بقا
ومن نقل حمله يكفّي يطيق او ما يطيق
عقّب اللي لارتكى للحمول ولا اتّقا
واحدٍ ماشيف فعله على الوجه الطليق
ما هقوا فيه الرياجيل خير ولا هقا
الصداقه تثمر الطيب والود العريق
كل ما مطر مزنها مهجة الروح وسقا
اصدقاك اللي سعدهم يفرّج كل ضيق
يوم للشدّات ضيقه وللضيق اصدقا
خل حبلك مع حبال الثنا دايم وثيق
واحد ما قد لقى الحمد قلّي وش لقا
العمر رحلة تعب من زفير اليا شهيق
بين لحظات الموادع ولحظات اللقا