يأخذني التفكير

لا تقول عطني للمحبه براهين
تبي تأكد كاني ما نسيتك
وأنت تعرفني من هاك الحين للحين
وأنت الوحيد أدورك ما لقيتك
أسج وأكتب في سجوجي دواويين
وأدعيك وأرجع خايبٍ لا دعيتك
وأمر قلبي والقفص والشرايين
يمكن ألاقي صورتك وسط بيتك
وألقى خفوقي زارعٍ لك رياحين
بنفس المكان اللي جعلته مبيتك
هو الوحيد اللي يمره محبين
ما تسمع إلا فيه كلمة فديتك
على مداد الشوف كله بساتين
ليتك قريب ومن وروده عطيتك
أنت الوحيد اللي بالأقصى والأدنين
لو تسألن عن نزع روحي هديتك
ظميان مره حطها لي عناوين
لو أشربك طول الدهر ما رويتك
كل شي في نفسي خذيته من سنين
إلا أنت نفسي فيك ولا خذيتك
ياخذني التفكير ما ادري على وين
من وين ما وديت وجهي لقيتك
حبي لك أشبه في قضيت فلسطين
ما أقدر عليك ولا قدرت ونسيتك
لوك تقدر بالذهب والملايين
ما جار بي وقتي عليك ورثيتك