أعز مخلوق

يابنت لا لا تجبريني على الشوق
الشوق فيني دون ما تجبريني
كلمة أحبك كلمةٍ كلها ذوق
وان مانطقت بها فلا تظلميني
منقوشةٍ في داخلي دون منطوق
نقش الكتابة ع الحجر من سنيني
قلبي يحبك حب صادق و موثوق
حبٍ كبيرٍ لك يفوق و يبيني
أحبك و حبك ترى عالياً فوق
كله شموخ و عزّ ابد ما يهيني
أحبك وقلبي من الشوق محروق
في غربتي حاير وحزني دفيني
يالله عساي القاك وارتاح وآروق
ويعود حبل الود بينك و بيني
وأقول أحبك و اروي الشوق بالشوق
وتبوح لي شوقك وأبيّح كنيني
وأقول لك خل الحزن عنك يا ذوق
اضحك وكحّل ناظري يا ظنيني
بعيونك اللي منّها صرت مسروق
لا سلهمت لي قلت ربي يعيني
وتقر عيني فيك يا أعز مخلوق
وأسعَد بشوف اللي أبيه و يبيني.