لا تحزني

يا طاهره ياعفيفه
تبسمي والخير لازال موجود
لا توجسي من حزن الايام خيفة
اليا حزنتي تصبح ايامنا سود
خلي عيونك ياعيوني كفيفه
عن قسوة الايام والضيق والكود
ياكسر قلبي يوم يحزن و ليفه
كسر القوي اللي من الضيم مضهود
حسن النوايا والقلوب النظيفه
يحيا بها الطيب ويرقا بها سنود
عيشي ربيع العمر وانسي خريفه
دام الامل موجود والرب معبود
انا احبك حب حاتم لضيفه
حبٍ على وضح النقا ماله حدود
في شوفتك تبقى سنيني مريفه
وإن كان غبتي يمسي القلب ملهود
والود ود احساس قلبي وكيفه
ما شوف حزنك بين الاهداب مشهود
يهمني واقع حياتك وطيفه
وانا معك وافي على النقص والزود
لاجل الغلا تبسمي يا لطيفة
ترى الحياة آمال وسهود ومهود