أمر الجار قبل أنزل ...

الشاعر القدير عبدالله بن محمد النوشان يخص «في وهجير» بجديده الشعري
ألا يالله طلبتك نحسن النية مع الجيران
ولا ننزل بحزم الضيق والبران موجودة
الا يالله لا تعمي بصايرنا عن البران
مدام أن السعة عنا جنوب وشرق ممدودة
أنا ما اطلع من الديرة ألز فلان هو وفلان
أدور للسعة والمنطقة ماهيب محدودة
أنا ابدخل على الله عن رجالٍ كنهم عميان
ولاشافو سمهدانٍ بعرض وطول ممهودة
الا يالله بقفرٍ ماوطاه الحاسد المنان
بعيد من البلد والناس واللي ماعرف فوده
ولا طبه غشيمٍ يحسب السيه هي الاحسان
عيونه عن سعى الله تقل بالشمع مسدودة
أنا ما اضايق الحربي ولا عتيبي ولا قحطان
أمر الجار قبل أنزل واجس النبض وأروده
أحب الشيمة اللي توصل الرجال عال الشان
ولا اضايق عباد الله لو أنزل ورى جودة
أنا وضعي مع الجيران لا راضي ولا زعلان
وكلٍ معجبه طبعه وتدبيره ومجهوده
يقوله شايبٍ ما ينطق الكلمة بلا ميزان
ولا يخطي ولا يقبل خطايا تقل مقصودة