تخاريف أبو العريف

@ ابو التخاريف اشلون خليجي 16 معاك؟
يامعود الدنيا في الكويت برد ولا في الاسكيمو حش مو برد هذا اللي عند اخوانا في الكويت... ولكن صدقني محبة اهل الكويت وكرمهم انسانا هالبرد.. لاتصدق؟
@ ابو العريف يقولون حفل الافتتاح رائع؟
بصراحة هو رائع واكثر من رائع لكن ابو التعاريف حس بالبرد في الملعب وراح المركز الاعلامي وصادف ان هناك (بوفيه) وخذ خلص الاكل كله عن الاعلاميين الله وكيلك ماخلص الحفل وجا الاعلاميين للمركز الصحفي الا ابو التخاريف خلص عليهم كل مالذ وطاب.
@ ابو التخاريف يقولون المركز الاعلامي عليه كلام؟
في هذي صدقت كل شيء ببلاش فاكس وانترنت ارسال صور يعني ماكو حجة للاعلاميين لظهور تغطيتهم على خير مايرام وكله كوم والكاتب الكبير محمد بنيس كوم آخر دورة الخليج مشتعلة وهو يردد القمر الازرق.
@ وشنوه هذا بعد القمر الازرق؟
بنيس عاشق للهلال السعودي وعندما سألوه لماذا الهلال قال كل شاب مراهق لابد ان يعشق في بداية مشواره وانا عشقت الهلال منذ شبابي فلا تلوموني في حب الطبيعة السماء زرقاء والبحر الازرق فلماذا لايكون قلبي ازرق.
@ والجوكر.. ماعنده حبيب مثل بنيس؟
الجوكر مسوي جمرك على الجوكم كل ماشافه قال له ترى الجوكر مثل اللاعب الجوكر في الملعب في اي خانة يلعب اما الجوكم فمعناه مخالفة مثل المخالفة المرورية وعندما سألنا عن المخالفات المرورية للجوكر في الامارات جانا الجواب.. عد واغلط من المخالفات.
@ يعني الاجواء عندم يابو التخاريف مشتعلة وايد؟
بس هالبرد اللي يدخل في العظم (مش) مطمني ويمكن يروح فيها ابو التعاريف ويطيح في المستشفى خاصة ان (الكوت) اللي يلبسه ما يأكل عيش حتى لو هو يشبه (كوت) مرعوب..
@ على فكرة شفت مرعوب في الكويت؟
ابدا بس وقفنا على الشارع ننتظر تكسي ماشفنا تالي شفنا واحد مثل سيارة دواس وركبنا معاه.