قولي للمدير الكبير في جريدتكم .. يخليني اشتغل معاكم

دردشة أطفال

@ ما اسمك ؟
أمل
@ طيب وعمرك كم؟
ما أدري أمي تقول اني خلصت الخمس ودشيت السبع.
@ وش أكثر شيء تحبينه ..؟
الروضة .. بس خسارة الحين هي مقفلة.
@ ومن اللي مقفلها ؟
الأبلة.
@ طيب ليش ؟
يقولون ان الدراسة خلصت
@ وبعد وش تحبين ؟
اللون الأحمر.
@ وش معنى هاللون الأحمر؟
عشان لون الايس كريم.
@ طيب لما خلصت المدرسة الآن كيف تقضين العطلة؟
اتفرج على اخواني وهم يدرسون وأكثر شيء أحبه واعتني به نبتةحلوة وصغيرة.
@ وكيف تعتنين فيها؟
اعطيها ماء وعصير واخليها تنام واغطيها عن البرد إذاجاء الشتاء.
@ بس كذا تموت إذا ما شمت الهواء ووصلت لها ضوء الشمس؟
لا ما اغطيها الى أن تموت شوي بس وافتح فتحات في الشرشف عشان يجيها هواء وتجيها الشمس.
@ طيب ايش اكثر هواية تحبين؟
الرسم والتصوير .. وزاوية المنزل في الروضة.
@ تحبين تصورين زي صورتك اللي طالعه اليوم؟
ايوه بس هذي مو انا اللي سويتها لكنما اصدر الشوارع والبيوت والأطفال وأمي.
@ يعني إذا كبرت تشتغلين بالتصوير؟
ايه بس أنا بصير ايله يعني ادرس الاطفال مثل ابله تهاني احبها كثير عشانها طيبة وحلوة.
@ يعني بطلت عن التصوير؟
لا بس انتم عندكم تصوير زينا في الجريدة يمكن اجي اشتغل
@ يعني وش تبين تشتغلين عندنا بالضبط؟
مع الحريم زيك واصور الأطفال عشان تنشرون سوالفهم وصورهم.
@ طيب أي اكثر تحبين الأولاد والا البنات ؟
البنات طبعا . لأني بنت حتى انت تلعبين البنات اللي زيك.
@ انتم في الروضة ايش كنتم تسون؟
نرسم ونكتب ونلعب.
@ مع مين تحبين تلعبين؟
مع الأبلة وريم وهديل وهبة.
لعبة الرسم
@ ماما تقول انك تحبين الكمبيوتر؟
ايه.. اكتب عليه وارسم واعرف له لأني مرة شاطرة.
@ لما تزورين مريض بالمستشفى وش نقول له؟
السلام عليكم وما عندك شر. ان شاء الله وإذا دخلت الفصل اقول السلام عليكم
ورحمة الله وبركاته لا شفت صديقتي اقولها زينة وش لونك؟
@ وين بابا يا أمل؟
عند الله.
@ تحبين الطبخ؟
ايه .. ولا
@ يعني شلون ..؟
يعني أحب أكل بيض والحليب ولا اعرف اطبخ بس أجيب الحليب من الثلاجة والبيض أمي تسويه بعدين إذاعلمتني اسويلك وحدة.
@ (أموله) تحبين تصيرين دكتورة في المستشفى إذا كبرتي؟
لا الدكتورة ما تعرف تعطي ابرة وتخلي الصغار يبكون.
@ طيب يا حلوة مبروك على تخرجك من الروضة وعقبال الشهادة الكبيرة؟
عندي شهادة كبيرة . فيه اكبر من شهادتي.
@ نعم فيه الجامعة .. ما تحبين تروحين لها إن شاء الله؟
الا احبها .. قولي يا رب تدخل امل الجامعة عشان اصور صورة وأنا كبيرة مع الأميرة.
@ طيب آخر كلمة وش تقولين؟
أنا فرحانة لانكم طلعتوا صورتي وسوالفي بجريدتكم ولا تنسين تقولين للمدير الكبير عندكم يخليني اشتغل معاكم واصوركم.