دردشة اطفال

@ ما أسمك؟
جمانة علي العيسى.
@ وش يعني اسمك؟
لؤلؤة كبيرة.
@ طيب ليه تقولينه وانت مستحية؟
كذا بس..
@ كم عمرك؟
ست سنين.
@ وش أكثر شيء تحبينه بالدنيا؟
بابا وماما.
@ ما ألعابك المفضلة؟
العروسة وألعاب المطبخ.
@ طيب العروسة وش منه مصنوعة؟
من جلد وخرز.
@ ودك تسافرين بر الديرة؟
أيوه اروح لمكة.
@ طيب تحبين البنات وإلا الأولاد؟
البنات طبعا لان الأولاد يضربون ما يعرفون يلعبون إلا بالضرب.
@ تحبين المدرسة وإلا الروضة؟
المدرسة أحسن عشان ما فيها أولاد.
بس الروضة أحلى عشان كلها ألعاب.
@ تروحين الملاهي؟
اروح وأكثر شيء احبها الزحليقة.
قولي لهم يحطون وحدة عند باب بيتنا؟
بعد قولي لهم يحطون لنا حديقة حيوان زي الناس.
@ وش تبينهم يحطون فيها؟
يكثرون من الحصان عشان انا أحب العب معه.
@ تحبين تلعبين على الكمبيوتر؟
ايه العب حروف ورسم.
@ وشو أكثر شيء ترسمينه؟
الحروف والورود والقطوة.
@ اذا كبرت وش ودك تصيرين؟
اكيد (ابله) عشان أعلم البنات يرسمون قطوة.
@ ليش أبله؟
زي ابوي.
@ ليه ابوك يشتغل استاذ؟
لا.. يشتغل (أبله) بمدرسة الأولاد.
@ ليه ما تصيرين طبيبة بالمستشفى مثلا؟
لا.. مو حلوة المستشفى يعطون ابرة ودواء مرة مر.
@ وش رأيك بالزواج؟
مو حلو.
@ ليه موحلو؟
عشان بعض الرجال خسيس يعذب الحرمة.
@ طيب لو عندك فلوس كتيرة وش تسوين فيها؟
اعددها كل يوم.
@ تحبين تساعدين أمك في البيت؟
ايه.. اغسل مع ماما وانظف الزولية.
@ وما تطبخين؟
الا اطبخ دجاج.
@ هذي كيف يسوونها؟
يحطونها على النار وإلا وسط الفرن.
@ كيف يصير الواحد قوي؟
لما يأكل سمك وحليب.
@ تحبين تطالعين التلفزيون؟
بس الكرتون.
@ وش رأيك بالسياسة؟
تشبه السيارة.
@ طيب انت وش تحبين تسوقين سيارة والا سيكل؟
احب اسوق السيكل ودايم العب فيها بحوش جدي.
@ طيب تعرفين معنى العلوج؟
ايه.. اعلوكه معلوكه.
@ تعرفين معنى الاقتصاد؟
ما دري.. بس هي حقت الصيادين في البحر.
@ طيب وهيئة الأمم المتحدة؟
يعني كل الأمهات.
@ وش نقول للمريض اذا رحنا نزوره بالمستشفى؟
عبودي سلام عليكم.
@ طيب وش تقولين وزير الصحة يعني مدير المستشفى؟
اقوله الله يخليك لا تعطي الأطفال إبرة وما عليش عطنا حبوب بدل الدواء المر.
@ ووزير المعارف يعني مدير المدارس؟
اقوله حط ملاهي بالمدرسة وخلنا نطلع بدري.
@ وش آخر كلمة تقولينها؟
قولي لماما خلاص تعبت تعالوا بكرة.