@ يا بو مشاري، @ سم يا بو فيصل. @ يخوي تدري ليه (صباح) دايما تتزوج أزواج أصغر منها؟؟ @ والله ما أدري واناخوك... علمي علمك... ليه؟ @ لأن أصلا ما فيه أحد أكبر منها!!! عرفت هالحين؟ @ (وبعد ضحكة صافية.. من القلب... سألني ابومشاري): طيب وش جاب هالموضوع على بالك يابو فيصل؟؟؟ @ والله سؤالك جيد يا بو مشاري... واللي جاب موضوع صباح على بالي هوان الناس دائما، وفي كل موضوع، إذا عرفوا السبب، بطل العجب،... @ طيب، والزبدة.. ندري، ما جبت لنا شي جديد يا حضرة الفيلسوف المبجل...! @ (وبعد أن عدلت جلستي)، قلت: الزبدة ان عندي فكرة، ما تخرش الميه.. ستحل مشكلة انتقاد التحكيم في البلد بشكل شبه جذري.. وستزيد من مكافآت الحكام المساكين بشكل جذري أيضا... @ ما شاء الله!!! هذي مو فكرة... هذي قارورة ماي صحة طلعت!!! @ اسمع بو مشاري.. بلا خفة دم زايدة...، اسمع الفكرة، وقول لي وش رايك... طبعا الكل زهق ومل من موضوع انتقاد الحكام والتحكيم بل و(لاعت) كبده (أي حامت وقاربت على الاستفراغ) من مسئولي الأندية وهم يكيلون لهم التهم ويستهترون بهم قبل وخلال وبعد المباريات.. مهما كانت نتيجة اللقاءات التي يحكمونها! بل، واصبحوا يتهمون هؤلاء الحكام بالعمالة والخيانات العظمى التي تتسبب في انقضاض (الشرنكح) في بؤرة البرطريط...!) وش قاعد أقول أنا؟؟ @ والله علمي علمك يا بو فيصل!! بسم الله عليك الرحمن الرحيم... لا يجيك شد عضل في لسانك بس!!! @ لا.. لا... هذا من الحماس بس... @ لا والله، هذا من كثر ما كنت تتابع الصحاف... أشوى انك ما كنت تتابع سوبرمان بس كان طرت علينا!! @ الزبدة.. خلني أكمل يا خفيف الدم انت بس!!! فأنا أقترح.. انهم يعطون الفرق التي ستتبارى الفرصة لاختيار حكامهم.. @ يا سلام عليك...!! يا فتك انت يا فنان!! أنا يا أخي ما أدري كيف تجيك هالأفكار النيرة هذي؟؟ @ الله يسلمك... (قلتها بابتسامة من الإذن.. وكأنني سعيدان اللي في طاش ما طاش!) @ فقال لي أبو مشاري وهو ثائر: لا.. لا.. انت مانتب صاحي اليوم يا بوفيصل!!! وش اللي الفرق تختار حكامها؟؟؟ صاحي أنت؟؟؟ الحمد لله رب العالمين... الله لا يبلانا بس!!! حشى، ما صارو حكام هذول... هذول صارو طلبيات بيتزا... شوي وتقول أبي حكم بجبن وزيتون... بس بدون لحم!! @ لحووووووول، يا بو مشاري... يا أخي عط الحر فرصة تكفي... لاتقعد تحكم الفكرة في مهدها الله يهداك.. تعلموا الانصات يا عربوووه... اسمع.. واعرف السبب وبعدين تفلسف الله يهداك! @ إسلم.. إسلم... هات اللي عندك... ولو إني داري والله ما عندك إلا الخرطي... هات أشوف..اتحفنا..! @ أوكي، ليش ما يعطون الفريقين المتنافسين الفرصة لاختيار ثلاثة حكام مفضلين (كحد أقصى) لاختيار أحدهم لقيادة مباراتهم الجاية مثلا،... وثلاثة حكام غير مفضلين.. وبكذا يكون عندنا قائمة لستة حكام من كل فريق... 3 مفضلين و3 غير مفضلين، وغالبا، ستجد عامل مشترك بين الحكام المفضلين وعامل مشترك بين الحكام غير المفضلين (وعلى أي حال حتى لو لم يكن هناك عامل مشترك بين الحكام غير المفضلين... يمكننا استثنائهم كلهم الستة من قيادة المباراة) وبكذا.. نكون حلينانصف المشكلة.. وتكون الفرق هي الي اختارت من تريد ومن لاتريد!!! وطبعا، يمكن تطبيق هذا على حكام الخط أيضا اذا أرادت الفرق ذلك، حسب نظرتها لحساسية وأهمية المباراة.. @ طيب، وافرض ان فريق (أ) اختار ثلاثة حكام مفضلين ولا يوجد فيهم عامل مشترك مع فريق (ب) وش العمل؟؟ يا ذكي؟؟؟ @ آآآآه، قلت لي وش العمل! الله يسلمك... في هالحالة... نكون على الأقل استثنيناالحكام غير المفضلين لكل فريق.. على أقل تقدير.. يعني اذا ما قدرنا نوفر لك اللي تفضله.. على الأقل ما نجيب لك اللي ما تبيه... وفي هالحالة... ما تقدر تتفلسف على لجنة الحكام ولا على الحكام أنفسهم.. وإلى اللقاء في الحلقة القادمة... مع أحلام..
