تخاريف أبو العريف...!!

@ ابوالعريف كيف الدنيا معاك هالأسبوع؟
جالس أفكر اشلون اصير مدرب, ما دام التدريب فيه سمسرة, وفيه دولارات وكل لاعب اجيبه باحصل من ورائه على مبلغ وقدره.. ليش ما أصير مدرب؟
@@ بس التدريب يحتاج لمتطلبات مش موجودة فيك؟
يارجال ايش يبليها هالمهنة بعض المدربين يدخنون شيشة وانا مثلهم وهذه أهم متطلبات المدرب السمسار, وانا أملك هذه المتطلبات..
@ يعني ماكو فايدة, ناوي اتصير مدرب؟
ترى الشغلة مو صعبة مثل أنت ما متصور كلها رئيس ناد يدافع عنك, ومدير كرة ما يدير ايش السالفة والمسألة تسلك. واذا زادت العملية ألعب دفاع وعلى الهجوم المرتد ويمكن تضرب المسألة ونطلع فائزين في كل مباراة.
@ ابو العريف هالأسبوع ما كو أغاني؟
القلب اخضر, والدنيا ماشية معانا ليش الحزن, وأنت كل أيام فرح..
@ وين الفرح؟
الله يهديك الأخضر جاب الكأس من الكويت, والدنيا فرحانة والدوري اشتعل, لكن الله يساعد الأهلاوية على غم الأربعة؟
@ والنصر والهلال؟
للأسف هذي السطور كتبها قبل اللقاء.
@ ابو العريف ضربت (الميدان) يوم النهائي مع البحرين, ضربة معلم في اللقاء مع محمد نور.
@ وأبشرك البكر قال لنور في الفندق ما دام سويت اللقاء معانا المباراة فيها هدف واحد فقط وانت بتسجله.
@ اف.. ايش قال نور بعد المباراة؟
قام يدور البكر وسماه (الساحر).
بس نور قدها وقدود قول وفعل قال بنعود بالكأس وسواها.
موغريبة لا عليه ولا على نجوم الأخضر, والغريب ان البطولة تروح لغيرهم.
@ ابو العريف سمعت أغنية عبدالمجيد عبدالله (تنتظر كلمة احبك شايفك مفتون فيها.. إلخ) لكن حتى الآن ما اشوف حبيبي قالها لي.
@ الصبر زين مع نهاية القرن بتسمعها منه, بس تسلح بالصبر مثل تسلح فرق الخليج لكرة القدم باللعب في دوري الدرجة الاولى ولا صعد حتى الآن.
@ لكن هالسنة ممكن يكون كلام ثاني للخليج؟
والله ايش اقولك بعد صفقة المليون وجاكسون وخالد مرزوق اذا ما صعد هالسنة, بيصير مثلك ينتظر كلمة أحبك حتى نهاية القرن الحالي.
@ ابو العريف.. إلا بسألك ايش أخبار مقرن الدوسري؟
يبي لكزس وفلوس وهدايا وهو بعيد عن النادي.. مسكين بعده يعيش في أحلام اليقظة, ورئيس النادي الرجال مو مقصر, لكن بعض اللاعبين (الله يهديهم.. !!) بعض الساعات يقضون على أنفسهم بتفكيرهم..!!
@ ابو العريف.. صراحة الاتحاد يخوف.
هو بس يخوف إلا يرعب, الله يساعد الفرق عليه هم يمسكون من... ويخلون من, حتى الاحتياطيين يخوفون.