من كثر ماله ساروا الناس برضاه

من قصائد الأمس

يالله ياللي بيدك العز والجاه
ياللي لخلات المخاليق رافي
يا من خلل عبدك ليابان ترفاه
يا عالمٍ غاية خفا كل خافي
الطف بحال اللي تبهذل بدنياه
وداج بجميع انحا النحايا وطافي
يطرد ورا حظٍ عليك انت مشكاه
لا شك شاف من الزمان اختلافي
من كثر ماله ساروا الناس برضاه
ولو كان ناقص قالوا الناس وافي
ومن قل ما بيده ترى الناس تشناه
لو كان يسقيهم عسل قند صافي
فالمال كم ساسٍ طمانٍ وعلاه
والفقر كم حطم روابع سنافي
لا شك ما للعبد عن حكم مولاه
من خير والا شر والرب كافي
ما كتب للمخلوق لا بد يلقاه
اما هزايم شر ولا عوافي