العمر يمضي والليالي ركيضه

الشعر نوّن بالوسم عانق الغيم
طيفه جلب للخير وابعد بقيضه
ورسالته ما تنحصر وصف للريم
فيه الهجاء والمدح غيضه وفيضه
وفيها وصوف البل وضح ومجاهيم
يفرق شعور الناس سوده وبيضه
والعلم قافي صافي(ن) دون تعتيم
ينهال حبره في بياض العريضه
خمس الفروض بوقتنا جاه تقسيم
وكن الفجر للبعض ما هي فريضه!
وقت المدارس نلتزم بالتعاميم
والطفل لامنّه تأخر غميضه
وممشى الفجر قد فاز فيه المغانيم
بشرى من اللي مخضر(ن) كل فيضه
وعلى المنادي مانبي اي تلزيم
تبغى تنول الخير اهجر نقيضه
والدنيا تسري يابشر مابها مقيم
والعمر يمضي والليالي ركيضه
دنياك هذي بالمكر له تباصيم
تدعي رجال(ن) مستصحه مريضه
أحفظ صلاتك تنعم الوقت وتقيم
والنفس تفرز في مصّف الحضيضه