نور اليراع

ياللي تقول الشعر ماهوب وقاد
عند النسايا كيف هالشعر موجود
اصلا شعورك يا الرجل كيف يزداد
ابدونها ياهيه مايحتمل زوود
للعاطفه للصدق للحب ميلاد
عمر المهد ماصار من غير مولود
دفئ المشاعر فيضها روح تنقاد!
نور اليراع اللي له تعيش وتجود
خط القلم لاصار له صوت وعناد
جهلٍ صنع في محكم العرُف منقود
يابو العقال اللي على هامتك ساد
اعقولنا تسرح بلا درب مسدود
حتى ولو مثلك نبت فيه سدّاد
ماهو كفو للشعر يبني له حدود
منهج عديم الحس في حقه حداد
تطرفه عار على نبعه صدود
شعر النسا ورثٍ من ايام الاجداد
تاريخنا عامر وله باع وشهود
(بخوّت) يبكيها مع الشعر امجاد
(وعمشا) لنا ماورّثت قاف معيود
ياللي تناثرتوا على بابه اعداد!
ماهزكم ثغر الحسد فيه وجحود
حنا بنات الفكر وفمجده عِتاد
ميثاقنا يرقى مع سنينه سنووود
حنا على راس الشعر نار وزناد
وش ينفع سلاحٍ له الحيل مهدود