ارسل الأشواق لأحبابي هدية

والله ان الجاذبية عاطفيه
تستحل القلب وتسوي فظايع
نظرة المشتاق مع غمزه خفيه
جابت المطلوب للطلاب طايع
هي ملامح وجه والا مزهريه
يا وروداً وصفها بالحيل رايع
كان لك قلبين ياكبر الخطيه
قلب شاري للحبيب وقلب بايع
عرفتي لك صاحبي صارت قضيه
هزّت الوجدان والدنيا وقايع
ما عوى ذيب الخلا بالمهمهيه
كود من زود العنا ظامي وجايع
ان سمعت الناي والا السامريه
لاع قلبي يا خلي القلب لايع
التغلي والدلع والنرجسيه
للعذارا شرع وفنون وطبايع
المحبه راحت الروح الشقيه
والقلوب أسرارها تبقى ودايع
ارسل الاشواق لاحبابي هديه
وان عشقت العشق بين الناس شايع
ما بلغت رضاك يالنفس العصيه
التعاسه ضيّعت سبع الصنايع
قيس جنه حب ليلى العامريه
مالقا له في مواصلها ذرايع
ما حسبت حساب كساب الرديه
عادت الرديان خسرات البضايع
عبدالله محمد الشمري