صوت الصورة

سبحان من سيّر صغار العصافير
تلغي على ريح الندى من عطشها
الواحد اللي كاسين ريش للطير
ملهم طيور الكون تبني عششها
عصفور ضامي يلتفت في محاذير
فنان من صور بدّقه كفشها
عبدالكريم ابراهيم بن خزيم - البكيرية
كن الغبارية تبي توخر التيب
يهرّب لها من بارد الماء قراحي
والثانية من شد حر اللواهيب
تحت المياه مرفرفه بالجناحي
سعود عبدالعزيز الهزاع - نعام
رف بجناحك تراك الفور
وتحمّل اليي يجي يبدر
وأصبر افتح لك الصنبور
ثقيل يا صاحبي ما اقدر
اشرب على نقطه القاطور
وﻻ يجي غيرك الاجدر
حمد عبدالله الوايلي - حوطة سدير
نصف الحياه وكلها قطرة المي
اللي بها تروى الكبود العطاشي
والله جعل بالمي حياة للحي
من رحمته يسوق فيه النواشي
ومن العطش يبحث هذا الطير عن شي
عساه بالصنبور يلقى انتعاشي
عبدالملك عبدالكريم - بريدة
هذا لهيب القيض ما يرحم الطير
حتى الجمل عَليان تسمع حنينه
مع طلعة المرزم نقص جمّة البير
تكفون ياهل الحقل لا تطردونه
نايف علي المقاطي – المزاحمية
طيراً يبي الماء على الخزان
مسكين ما جاه مقصوده
في انتظار نقطةٍ عطشان
ولا حوله أحدٍ له يزوده
يا من يبي الأجر يالأخوان
يبني له الأحواض بجهوده
ريان محمد الخنيفر - الرياض
تبي تبل الريق بالحيل عطشان
من شاف حالك قال واعزتي له
وأخوك بالبزبوز يحاول وبحلان
يبي يفك الماء وما فيه حليه
خالد بن ناصر المخيمر - روضة سدير
بزبوز ناشف بوسط الصيف
يا طير حاول تجيب حلول
والطير ما يفهم التوصيف
لكن يحاول عساه ينول
سعود عائش الحربي - جدة
يا طير يا طير لا تتعب الحال
هذا هو الحر لأصبح شديدي
وتشاهد أخوك يتعب ولا زال
ما يفتح الصنبور غير الحديدي
سعود سمران الدوسري
صورة العدد
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم من الصور الهادفة والطريفة.. ويا هلا